من الأمور اللي اعشقها في ليالي الشهر الفضيل قراءة حبيبتي مساء، خاصة والواحد توه امخلص صلاة التراويح ومعين من الله خير، وعلى قولة اخواننا المصريين قاعد «يسلك زوره» بجم حبة كبة على حبتين سبموسة من الصحن اللي جدامه على الطاولة، وعقبها يلحفهم واهو امسوي روحه مايدري بجم قطيفة على جم حبة صب القفشه اللي اتخشونها عن صديجكم من نطاعتها، وفوقهم استكانة قهوة عربية متروسه هيل، وما يخلا الأمر من قلاص شاي اخضر على شان بس تأنيب الضمير.
وبما ان الجميلة الجريدة توصلكم بحلتها اليديدة بالليل فراح امسي عليكم واقول مساء الخيرات والمسرات، مساء خاص بسادس يوم من ايام أيام الشهر الفضيل اللي قاعد يمر بسرعة وبسهولة، رغم عداد الحرارة اللي واصل المليون، بس ان شاء الله كله بأجره.
تحلطمي اليوم راح اخليه حق الجميلة المملوحه ام عين جريئة، على قولة العندليب الراحل عبدالحليم، العروس الملكية ميغان بنت العم ماركل، ربي يحفظه ويشافيه ويعافيه عقب العملية اللي سواها قبل جم يوم، واللي ما خلته يكحل عينه ويشوف فلذة كبده واهي تتمخطر بالإكليل اللي ما ينفع جدام العالم واهي تنزّف حق فارس احلامها هاري ولد الصديق الصدوق تشارلز، وطبعا هالتحلطم ماراح يكون مثل اللي انترس فيه الطير المدلقم عن بكرة ابيه ولا ولد عمه انستغرام وولد جيرانهم سناب ولد حجي شات، لا طبعا تحلطمي شكل تاني حبك انت، لأن اهم اصلا شكل تاني بكل شي، بس بصراحه اقولها وبكل فخر انتو ابداع، انتو عطيتوا المخابرات الأميركية، الروسية، الإيرانية.. مليون صفر على الشمال، يعني بغضون دقايق الا مو ثواني طلعتوا history الكامل حق العروس وصور مراهقتها وشنهو تحب وشنهو ما تحب وين راحت ومن ين يات، فبرافو عليكم ياشعب الله المختار المفروض الحكومه الرشيده تستغلكم احسن استغلال، وتستغل مدركات تفكيركم بكيفة الوصول للمعلومة بغضون ثواني وكيفية نشر الخبر والترويج له.
أم خنفوره المطلقة!
والله العظيم 6 ساعات بالتمام والكمال، عمر وصلة الحش والقراظ والتطنز والتحليل الدايخ اللي رصدتها امس، بس خلال موقع الطير المدلقم ابو شعر امنتف (تويتر) وتحديدا بس في الكويت، 6 ساعات وانا مغير بس اشوف هالكلمات، عبده، ساحرته، اكبر منه، شيفه، قيفه، امطلقه، اتلوع الجبد، ام فلافل وغيرها من الكلمات اللي مادري اشلون كانت تنقال بنهار رمضان، 6 ساعات وانا اشوف نفس بغيض وعنصرية مالها وصف ولا مرت علي من قبل للأمانه، الصراحه وايد كسرتوا خاطري يا شعب ماتدرون شنهو تبون بالضبط؟ وايد اشفقت عليكم لأن هذا بس حد تفكيركم وهذا بس حد مخيلتكم أن الأميركية البرونزيه السمحه ام عيون اتينن ساحره الأمير وقاصه عليه وامسويتله اطبوب وعمل وخرابيط وبرابيط مثل اللي بعضكم يعرفها ويموت انه يسويها.
ياجماعة الخير خافوا الله الناس وين وانتو وين، انتو وين تبون الله يوفقكم ويشرح دربكم ويرزقكم وانتو قلبكم امغبط جغاله وحقد وحسد؟ انتو وين تبون الدنيا تنشرح بويوهكم وانتو عيونكم امبققه على رزق وحال غيركم؟ انتو وين تبون الله يستجيب لكم وانتو فصصتوا البنت وطلعتوا تاريخها على اساس انكم ماشاء الله تبارك الرحمن توكم مولودين ما عندكم لا اخطاء لا اغلاط.
ترا الأوادم مو كلهم مثلكم ومو كلهم مثل تفكيركم الضحل اللي لما تسمعون ان واحد ولد عايله وعنده خير تزوج وحده اكبر منه ولا امطلقه على اساس ان هالشيين جريمه ولازم يعاقب عليها وترجم عليها البنت، ترا الأوادم مو كل همهم اشكثر المهر وين بسكني وين بسويلي العرس وين بسفرني وشنهو بيهديني؟ ترا هالناس عندهم شي وايد اكبر واسمى عندهم الحب، عندهم الاستقرار، عندهم حب السكينه، عندهم الأمان، عندهم القناعة اللي اتوقع ان بينها وبينه عداوة.
فمو كل شي اتفسرونه انه اسحور وطبوب جزاكم الله خير علشان لا اتصيرون وايد اتضحكون جدام الناس، لأن كمية الجهل والسطحية اللي شفتها بتعليقات ثلاث ارباعكم امس خلتني اقول لا مو من صجهم الكويتيين لهذي الدرجه؟ لهذي الدرجة وصل الحقد والحسد والغيرة؟
تشريبة أوضاح!
الصراحة ما ضحكت على التعليقات ولا الشطه اللي مشتطينها الكويتيين واللي اتوقع انها اكثر من شطة اهل العرس إلا التعليق اللي وصلني من صديقتي الجميلة (اوضاح الشمري) على صورة الأمير هاري واهو يطالع بكل شغف وحب ووله واعجاب مرته وحبيبته، ويقول لها اني محظوظ فيج فتسألني صديقتي الجميله اوضاح: روابي اتهقين اكو احد يطالع حبيبته بنفس هالنظره اللي كلها حب واعجاب وامتنان؟
انا وايد خفت على مشاعر صديقتي وخفت ان صيامها ينجرح خاصة ان الساعه كانت خمس ونص المغرب، فكان ردي مثل الصاعقة عليها وادري اني لو كنت اقبالها جان هفتني بأكبر ما عندها، فقلت لها حبيبتي اوضاح خلج من هاري وميغان وفكري اتحطين فص الثوم على اليمين ولا اليسار بصحن التشريب؟
بآخر المتمه ما اقول الا ربي يسعدج يا ميغان ويشافي ابوج وما تدور السنة الا وضناج بحظنج ان شاء الله علشان اللي خبري خبرج يندقون عدل.
