تحلطم صايمة كويتية

مبارك عليكم شهر الخير والفضيلة والرحمة والسعادة يا معشر الصيام، أسأل الله تعالى أن يوفقنا جميعا لطاعته وحسن عبادته، وأن يعيده علينا وعليكم وعلى كل من يعز عليكم بالخير والمغفرة والرحمة لا فاقدين ولا مفقودين، زايدين مو ناقصين مستانسين مو مقلدمين ضعفانين مو طايشين، وهذا اهم شي لأن ورانا سفرة الصيف، المهم ان شاء الله اتكونون بأحسن حال وخير وصحة وعافية بهالشهر الفضيل امين يارب العالمين.

ادري صيام وراسكم يعوركم ومالكم خلقي ولا خلق هذرتي، خاصة اذا كنتو توكم امتروحين ومعينين من الله خير وتوكم تقولون ياهادي ومسكتوا الريموت بالإيد اليمنى وصحن السمبوسه المقرمشه بالإيد اليسرى، واستكانة الشاي اللي ما تنفع جدامكم، وبينكم وبين عمركم تقولون ان شاء الله ما يدش علينا احد، لأن مالنا خلق تونا امصلين ومعينين من الله خير ونبي انتسدح وانتبطح علشان يفج عوار الراس اللي حايشنا من اول يوم ومو راضي يشوف له نافوخ ثاني يعشش فيه، بس فوق هذا كله بصير دعله عليكم وبطلبكم طلب لا تحاتون ماراح اقول طرشولي نقصه من سمبوستكم المقرمشه، ابيكم يامحفوظين السلامه بس تبتسمون لأنكم تملكون خوش ابتسامة ترد الروح وتسر الخاطر وتشرح القلب.
هذي بتكون اول هذره لي معاكم بهالشهر الفضيل، واللي حبيت اسميها «تحلطم صايمة كويتية» علشان اتحلطم معاكم طول الشهر بكل شي انشوفه خارج عن العادة، وماشاء الله بعض مواطني وطن النهار الله يحفظهم يموتون على الأشياء والفعايل الخارجة والخارقة للعادة، عاد انتو أي شي اتشوفونه خارق وخارج على طول غششوني لا تصيرون ابخله علشان نتحلطم فيه اهني ونوصل رسالة حق الخارجين والخارقين جود الله ورحمته نصلح ما يمكن اصلاحه.

إشرايكم انجرب؟
اول هالأشياء الخارقه اللي اتمنى من نخاشيش قلبي، على قولة ابناء النيل العظيم، انها تختفي بهالشهر الفضيل واللي، للأسف، انها صارت عرف رمضاني كويتي تتوارثه الاجيال، الغزو الكويتي الرمضاني على الجمعيات التعاونية، وتحديدا بعد ان يهل علينا مذيع القناة الأولى بتلفزيون الكويت وهو ساكب بالغترة المنشية والدشداشة التي تلمع من كثر الأوتي يبشرنا بنتيجة اجتماع هيئة الرؤية الشرعية إيذانا برؤية هلال شهر رمضان المبارك، فعقب هالإعلان تبدا رحلة الكفاح من اجل البقاء وتبدا حالة الاستنفار بشوارع الكويت وضواحيها، ويبدا السباق الماراثوني الكويتي منهو يوصل الجمعية قبل الثاني ومنهو يحصل عربانه قبل الثاني.
ياجماعة الخير هوب هوب ترا عند الله سعة، والخير وايد ولله الحمد، والله العظيم الاكل موجود والديرة بخير والمخازن فايضة من المواد الغذائية، والجمعيات تشتغل على مدار الساعة، صدقوني والله العظيم ماراح تموتون من اليوع، ولا راح تنهارون اذا ما لقيتوا توست وكريمه علشان اتسوون طبق الدجاج بالذره والكريمه، كل شي متوفر وكل شي زايد هذي الكويت ديرة الخير، احنا ايام الغزو الله لا يعود، ما يعنا ولا متنا من اليوع ولا نقصنا شي الحين تبون ينقصنا؟
ترا كلش ملش ماله داعي التزاحم والتدزز والخناق على العربانات بالجمعيات تكفون.
انا بسالفة الجمعيات وزحمتها ما يكسر خاطري الا بعد قلبي «الفيمتو» اللي يحس انه له كيان ووجود، لأنه طول السنة مركون على الرف بالجمعية مغير يمشون الغبره اللي عليه ويردون لي وره ومحد يطل في ويهه، بس لما يطلع لنا المذيع بوغترة منشيه ويقول ان باجر غرة رمضان، اهنيه تتهلل اسارير «حجي فيمتو» ويشيخ، لأن راح يتم الافراج عنه من رف الجمعية وراح يصول ويجول بمناطق الكويت، وفي بعض الاحيان يتعزز ويتغلى ويخش عمره والناس مغير مطارد وراه من جمعية لي جمعية يدورونه ويتخامطونه، لأنه يسرسح على قلبهم ويرد الروح فيهم بعد الصيام.
فرجاء خاص جدا عفيه ماله داعي زحمة الجمعيات وماله داعي دزني ودزك وماله داعي تكود الأكل، لأن هذا ارمضان شهر الخير والبركه مو غزو ولا حرب بارك الله فيكم.

ابتسموا تصحّوا!
بما ان هذي اول حلطومه وقرطومه لنا بهالشهر، فودي ان اقترح عليكم شي وان شاء الله اتوافقوني اياه، ودي يكون ارمضان 2018 غير بكل شي، يعني ما يكون بس شهر صكة حلوج عن الأكل والشرب، ودي يتعدى مرحلة صيام «الحلوج»، وبمعنى ادق الصيام الشكلي من الفجر ليمن المغرب الى الصيام الفعلي اللي يلازمنا على طول، يعني ان يكون صيامنا صيام عن الحقد والحسد والكذب والحش وتربط العصاعص، والملاقة الزايدة والتفلسف اللي ماله موديل ولا داعي واللي البعض ذبل جبدنا فيه طول السنة.
شرايكم انجرب صدقوني ما راح نخسر شيء، بالعكس راح نكسب وايد اشياء اهمها الهدوء والاستقرار على جميع الأصعدة، وتسيير للأمور المعلقة، وسكينه ما بعدها سكينه، فالشياطين، الله يعوذنا منهم، تربطت بهذا الشهر ليش احنا ما نصير احسن منها وانتربط.؟